Balotelli farinn til Nice

Mario Balotelli er farinn til franska liðsins Nice frá enska úrvalsdeildarliðinu Liverpool.

Balotelli kemur á frjálsri sölu til Nice en Liverpool hefur reynt að losna við hann í allt sumar.

Balotelli kom til Liverpool fyrir tveimur árum. Ítalski framherjinn skoraði aðeins eitt mark í 16 deildarleikjum fyrir Liverpool tímabilið 2014-15. Hann var svo lánaður til AC Milan á síðasta tímabili en fann sig heldur ekki þar.

Balotelli hefur einnig leikið með Lumezzane, Inter og Manchester City á ferlinum. Þá á hann 33 A-landsleiki að baki fyrir Ítalíu.