Stiglitz sakar stjórnvöld í Panama um ritskoðun

Ríkisstjórn Panama sagði það á sínum tíma ómaklegt að landið væri stimplað sem skattaskjól, eftir að ríflega 11 milljónir skjala, sem lekið var frá lögfræðistofunni Mossack Fonseca í apríl, afhjúpuðu umfangsmikinn iðnað um að aðstoða efnafólk um allan heim við að koma fjármunum undan skatti í heimalöndum sínum.

Í kjölfarið skipuðu panömsk stjórnvöld sjö manna ráðgjafanefnd til að fara yfir hvernig málum væri háttað. Auk fimm panamabúa voru tveir erlendir sérfræðingar ráðnir til að stýra verkinu, hagfræðingurinn og nóbelsverðlaunahafinn Joseph Stiglitz og svissneski spillingarsérfræðingurinn Mark Pieth.Þeir hafa nú báðir sagt starfi sínu lausu vegna ítrekaðra afskipta panamskra stjórnvalda af störfum nefndarinnar, sem þeir segja jaðra við ritskoðun.

Óttast að skýrslan verði aldrei birt

Stiglitz sagðist í samtali við Reuters fréttaveituna hafa talið þegar hann hóf störf að stjórnvöldum í Panama væri alvara, en annað hefði komið í ljós. „Það er með ólíkindum hvað þau hafa reynt að grafa undan störfum okkar," hefur Retuers eftir Stiglitz.

BBC hefur eftir yfirlýsingu frá utanríkisráðuneyti Panama að skilningur sé á því að erlendu sérfræðingarnir tveir hafi hætt vegna innri ágreinings, en að ríkisstjórnin ítreki skuldbindingu sína til að stuðla að gagnsæjum stjórnarháttum og alþjóðlegu samstarfi.

Þeir Stiglitz og Spieth segja hinsvegar við Reuters að þeir hafi áhyggjur af því að lokaskýrsla ráðgjafanefndarinnar muni aldrei koma til með að birtast opinberlega. Þeir draga þá ályktun af reynslu sinni að ríkisstjórn Panama sé undir miklum þrýstingi frá þeim sem eigi fjárhagslega hagsmuni undir því að áfram verði rekið ógagnsætt fjármálakerfi sem styðji skattaskjól í Panama.