Stóri Sam líklegastur til að taka við Crystal Palace

Sam Allardyce þykir líklegastur til að taka við enska úrvalsdeildarliðinu Crystal Palace af Alan Pardew sem var rekinn fyrr í dag.

Samkvæmt heimildum Sky Sports mun Allardyce hefja viðræður við forráðamenn Palace á næsta sólarhringnum.

Ekkert samkomulag er þó í höfn en Allardyce vill fá að vita hversu miklu hann getur eytt í leikmenn í næsta félagaskiptaglugga. Hann vill einnig vita hvernig samstarfinu við Steve Parish, stjórnarformann Palace, og bandaríska eigendur félagsins verður háttað.

Allardyce hætti sem kunnugt er með enska landsliðið í september eftir uppljóstranir the Telegraph. Hinn 62 ára gamli Allardyce er þó hvergi hættur og hefur lýst yfir áhuga sínum á að snúa aftur í ensku úrvalsdeildina.

Meðal annarra sem hafa verið nefndir sem mögulegir arftakar Pardews eru Chris Coleman, landsliðsþjálfari Wales, og Roy Hodgson, fyrrverandi þjálfari enska landsliðsins.

Palace er í 17. sæti ensku úrvalsdeildarinnar með 15 stig, einu stigi frá fallsæti. Liðið hefur tapað átta af síðustu 10 deildarleikjum sínum. Næsti leikur Palace er gegn Watford í hádeginu á öðrum degi jóla.