Wenger lætur vita um framtíð sína í apríl

Arsene Wenger, knattspyrnustjóri Arsenal, segist ekkert ætla að velta sér upp úr framhaldinu hjá félaginu fyrr en í apríl þrátt fyrir að samningur hans klárist í vor.

Hinn 67 árs gamli Wenger hefur stýrt Arsenal í tuttugu ár en undir hans stjórn hefur Arsenal þrívegis hampað enska titlinum sem og sex sinnum enska bikarnum.

Stuðningsmenn Arsenal eru sumir orðnir þreyttir á Wenger eftir titlaleysi í lengri tíma og hafa kallað eftir breytingum. Þrátt fyrir það segist Wenger ætla líkt og 2014 að skoða málin þegar tímabilið er búið.

„Ég mun skoða málin í vor og taka ákvörðun. Félagið hefur sömu möguleika, við erum sammála um að ræða þetta síðar. Þetta mun ekki angra mig, ég held áfram að vinna mína vinnu.“