Herrera finnst hann aldrei vera öruggur hjá Manchester United

Ander Herrera, spænski miðjumaðurinn í liði Manchester United, finnst hann aldrei vera öruggur um sæti sitt í byrjunarliði United þar sem hann segist vera að spila fyrir stærsta félagið á Englandi.

Spánverjinn smái en knái er búinn að spila vel á leiktíðinni og er að mynda sterkt miðjutríó með Michael Carric og Paul Pogba. Hann er búinn að byrja ellefu af síðustu tólf leikjum United í deildinni en í þessum eina sem honum vantar upp á var Herrera í banni.

Herrera hefur átt í erfiðleikum með að festa sér sæti í byrjunarliði United frá því að hann kom til liðsins og nú ætlar hann sér ekki að missa það. Aðspurður hvort hann ætli sér að vera áfram á Old Trafford í tímaritinu Inside United segir sá spænski:

„Já, en maður veit aldrei því ef maður vill halda áfram að spila fyrir United verður maður að spila vel því United er stærsta félagið á Englandi.“

„Félagið hefur bolmagn til að fá hvaða leikmann sem er þannig maður þarf alltaf að vera upp á sitt besta ef maður vill spila fyrir United. Þetta er ekki auðvelt en ég geri eins vel og ég get og mun berjast áfram fyrir mínu,“ segir Ander Herrera.