Sturridge ósáttur: Ég skora og gef stoðsendingar

Daniel Sturridge, leikmaður Liverpool og enska landsliðsins, er ekki sáttur við að hafa fengð á sig þann stimpil að hann sé of eigingjarn.

Enskir fjölmiðlar hafa fullyrt að Jürgen Klopp, stjóri Liverpool, vilji frekar nota aðra leikmenn í sínu liði - leikmenn sem leggi meira á sig fyrir liðsheildina en hann.

Sturridge var í byrjunarliði Englands gegn Skotlandi á föstudag og skoraði þá í 3-0 sigri sinna manna en samantekt úr leiknum má sjá hér fyrir ofan.

Sjá einnig: Messan: Er Sturridge leikmaður að skapi Klopp?

„Það skiptir ekki máli hvað fólk segir um mig. Það er ósanngjarnt. Það er ósanngjarnt. Ég hef ekki áhyggjur af því hvað fólk hefur að segja um mig,“ var haft eftir Sturridge í Mirror um helgina.

„Ég tel að ég leggi mitt af mörkum fyrir liðið. Ég gef stoðsendingar og skora mörk,“ sagði hann enn fremur.

„Ég nýt þess að skora eins og allir framhejrar. En það eina sem skiptir máli er að liðið vinni og maður er þá hluti af þeim sigri.“