Redknapp hélt því leyndu að leikmenn væru að veðja á leiki

Breski fjölmiðilinn Telegraph heldur áfram að koma upp um misferli þjálfara úr ensku úrvalsdeildinni.

Í gær kom í ljós að Harry Redknapp hefði haldið því leyndu fyrir knattspyrnusambandinu að leikmenn hans hefðu veðjað á eigin leiki.

Sam Allardyce var sagt upp störfum sem þjálfara enska landsliðsins á dögunum eftir aðeins 68 daga í starfi.

Tók hann við 400.000 punda greiðslu fyrir að aðstoða austurlenska viðskiptajöfra við að komast framhjá reglum enska knattspyrnusambandsins um félagaskipti leikmanna í gegnum þriðja aðila.

Þetta reyndist aðeins byrjunin en Jimmy Floyd Hasselbaink, stjóri QPR, Massimo Cellino, eigandi Leeds og þjálfarar úr þjálfarateymi Barnsley og Southampton hafa meðal annars verið nafngreindir hjá Telegraph.

Samkvæmt reglum enska knattspyrnusambandsins er leikmönnum óheimilt að veðja á eigin leiki og er knattspyrnustjórum gert að tilkynna til sambandsins ef leikmaður brýtur reglurnar.

Í samtalinu sem blaðamenn Telegraph tóku upp án vitundar Redknapp greinir hann frá því að hann vissi af því að allir leikmenn liðsins hefðu veðjað á úrslit leiks eftir að hafa séð góða stuðla.

Redknapp tekur þar fram að hann hafi ekki haft hugmynd um veðmálið fyrir leik en hann virtist gera lítið úr málinu þar sem leikmennirnir hefðu aðeins verið veðja á eigin sigur.