Mata: Maður getur ekki verið að velta sér upp úr gagnrýnisröddunum

Juan Mata, leikmaður Manchester United, segir að leikmenn liðsins verði að temja sér þær vinnureglur að lesa ekki fjölmiðla og hlusta ekki of mikið á gagnrýnisraddir. Þetta hafi hann lært eftir að hann gekk í raðir United á sínum tíma.

United tapaði þremur leikjum í röð í öllum keppnum á dögunum og fengu leikmenn liðsins yfir sig mikla og harða gagnrýni. Mata hefur lært að hlusta ekki á slíkt og einbeita sér að leiknum sjálfum.

United vann auðveldan sigur á Englandsmeisturum Leicester í gær og það áður vann liðið þægilegan, 3-1, sigur á Northampton Town í bikarnum.

„Það er alltaf gríðarlega mikil umræða í kringum Manchester United, enda einn stærsti klúbbur í heiminum,“ sagði Mata í samtali við MUTV.

„Augljóslega voru margir að bíða eftir að við myndum tapa, og auðvitað gerðist það að lokum. Við þurfum bara að læra að takast á því svona tíma. Ég sem atvinnumaður hef lært að maður getur ekki verið að hugsa út í hvað öðrum finnst. Ef maður fer að velta sér upp úr gagnrýnisröddum verður maður bara klikkaður.“