Tilbúin til að uppfylla skilyrði Boko Haram í skiptum fyrir Chibok-stúlkurnar

Muhammadu Buhari, forseti Nígeríu, segist reiðubúinn til að sleppa föngum, vígamönnum Boko Haram, í skiptum fyrir stúlkurnar sem teknar voru úr heimavistaskóla í bænum Chibok í norðurhluta Nígeríu árið 2014.

Vígasamtökin birtu í síðasta mánuði myndband þar sem um fimmtíu stúlkur standa fyrir aftan liðsmann Boko Haram. Þar krefst hann þess að liðsmönnum sínum verði sleppt úr haldi í skiptum fyrir stúlkurnar, en talið er að um 219 stúlkur séu í haldi Boko Haram.

Nígersk stjórnvöld áttu í viðræðum við samtökin á síðasta ári. Að þeirra sögn náðu aðilar samkomulagi en að nokkrum vikum síðar hafi Boko Haram lagt fram frekari kröfur sem stjórnvöld hafi ekki viljað uppfylla. Guardian greinir frá því í dag að nú séu yfirvöld tilbúin í næstu samningaviðræður, og að vígamönnum Boko Haram verði sleppt úr haldi í skiptum fyrir stúlkurnar.

Boko Haram hefur síðastliðin ár háð blóðuga baráttu í norðurhluta Nígeríu. Þau eru í dag nátengd hryðjuverkasamtökunum ISIS en Boko Haram berjast fyrir sjálfstæðu ríki múslima í Nígeríu.