Rooney tók valdið af Hodgson

Wayne Rooney segir að hann hafi tekið fram fyrir hendur landsliðsþjálfarans Roy Hodgson á EM í sumar.

Það kom mörgum á óvart að Harry Kane var látinn taka allar hornspyrnur fyrir enska liðið í fyrsta leik þessa á mótinu, gegn Rússlandi.

Það breyttist svo strax í næsta leik en þá tók Wayne Rooney allar hornspyrnur.

„Það var ákvörðun Roy að láta Harry taka allar hornspyrnur. En Harry var markahæsti leikmaður ensku úrvalsdeildarinnar og hættulegur maður í teignum,“ sagði Rooney við enska fjölmiðla.

Sjá einnig: Rooney hættir eftir HM í Rússlandi

„Ég held að Harry hafi ekki viljað taka hornin eftir fyrsta leikinn og því tók ég þau. Mér fannst í raun að ég hefði átt að taka þau strax frá upphafi.“

„Það var í raun allt og sumt. Mér finnst í lagi að leikmenn taki sumar ákvarðanir úti á vellinum. Maður tekur ákvarðanir út frá því sem maður sér inni á vellinum. En það var ekkert meira gert úr þessu og Roy hafði engar athugasemdir um það.“

England komst áfram úr sínum riðli á EM en féll svo úr leik í 16-liða úrslitum eftir tap gegn Íslandi. Roy Hodgson sagði starfi sínu lausu strax eftir leikinn.