Conte ekki bjartsýnn um að ná í fleiri leikmenn

Antonio Conte, knattspyrnustjóri Chelsea, segir að félagið verði í vandræðum með að semja við fleiri leikmenn áður en félagaskiptaglugginn lokar 31. ágúst.

Liðið hefur nú þegar styrkt hópinn með því að fá þá N'Golo Kante og Michy Batshuayi í sumar en Conte hefur viljað fá fleiri leikmenn fyrir komandi átök í ensku úrvalsdeildinni.

„Ég verð að vera hreinskilinn, ég held að við eigum ekki eftir að ná að semja við þá leikmenn sem við viljum fyrir lok félagaskiptagluggans,“ sagði Conte á vikulegum blaðamannafundi í gær.

Hann segist ekki hafa útilokað neitt en er ekki bjartsýnn.

„Við þurfum að einbeita okkur að leiknum gegn Burnley um helgina og síðan sjáum við til hvernig málin þróast.“