Wenger hefur áhyggjur af meiðslum Coquelin

Arsene Wenger, knattspyrnustjóri Arsenal, segist hafa áhyggjur af því að Francis Coquelin verði lengi frá vegna meiðslanna sem hann hlaut á Emirates-vellinum gegn Chelsea í gær.

Arsenal vann frábæran sigur á Chelsea, 3-0, en Coquelin varð að fara af velli á 36. mínútu eftir að hafa reynt í nokkrar mínútur að spila áfram. Wenger óttast að hann verði jafn lengi frá keppni og á síðasta tímabili þegar hann var meiddur í tvo mánuði.

„Hann meiddist á hné og á nákvæmlega sama stað og á síðasta tímabili,“ segir Wenger.

„Við höfum ekki fengið neitt staðfest en þetta lítur ekki nægilega vel út. Coquelin varð að yfirgefa völlinn á hækjum.“