Milner hættur í landsliðinu

James Milner, leikmaður Liverpool, hefur lagt landsliðsskóna á hilluna.

Hinn þrítugi Milner lék sinn fyrsta A-landsleik fyrir England árið 2009. Milner lék alls 61 landsleik og var í leikmannahópi Englands á fjórum stórmótum.

Milner var í enska hópnum á EM í Frakklandi en lék aðeins þrjár mínútur á mótinu.

Næsti leikur Englands er gegn Slóvakíu í undankeppni HM 2018 4. september næstkomandi. Það er jafnframt fyrsti leikur enska liðsins undir stjórn Sams Allardyce.