Mahrez á leiðinni til Arsenal fyrir 50 milljónir evra

Svo virðist sem Alsíringurinn Riyad Mahrez sé á leiðinni til Arsenal og mun Lundúnaliðið greiða 50 milljónir evra fyrir þennan magnaða leikmann sem sló í gegn á síðasta tímabili með Leicester. Þetta kemur fram í frétt hjá Eurosport.

Mahrez var valinn besti leikmaður tímabilsins í vor en hann skoraði 17 mörk og lagði upp ellefu í ensku úrvalsdeildinni, algjör lykilleikmaður í liði Englandsmeistaranna.

Útlitið ekki alveg nægilega gott fyrir Leicester en N'Golo Kante gekk í raðir Chelsea á dögunum og þeir tveir voru magnaðir fyrir Leicester í vetur.