Úrvalslið leikmanna sem Arsenal missti af

Sky Sports birti í gær úrvalslið leikmanna sem Arsene Wenger, knattspyrnustjóri Arsenal, hefur misst af í gegnum tíðina.

Arsenal missti af Jamie Vardy, framherja Englandsmeistara Leicester City, fyrr í sumar en hann er ekki sá fyrsti sem hefur runnið úr greipum Wengers síðustu ár.

Það er ekki þverfótað fyrir stórstjörnum í þessu úrvalsliði Sky Sports en þar má m.a. finna Cristiano Ronaldo, Lionel Messi og Paul Pogba, sem allt bendir til að sé á leið til Manchester United.

Arsenal hefur ekki unnið Englandsmeistaratitilinn síðan 2004 en leikmennirnir í þessum „næstum því“ úrvalsliði hefðu eflaust hjálpað Skyttunum að vinna nokkra titla.