Bournemouth kaupir efnilegasta leikmann neðri deildanna

Enska úrvalsdeildarfélagið Bournmouth hefur keypt enska unglingalandsliðsmanninn Lewis Cook frá Leeds United.

Cook lék 80 leiki fyrir Leeds United þó hann sé aðeins 19 ára gamall. Hann kom inn í lið gamla stórliðsins aðeins 17 ára og var einn allra besti leikmaður liðsins á síðustu leiktíð.

Cook gerði fjögurra ára samning við Bournemouth en kaupverðið var ekki gefið upp. Cook var valinn besti ungi leikmaður neðri deildanna á Englandi á síðustu leiktíð.

Miðjumaðurinn ungi var í U-17 ára landsliði Englands sem varð Evrópumeistari fyrir tveimur árum en nýráðinn þjálfari Leeds, Gary Monk, tók hann úr U-19 ára landsliði þjóðarinnar sem undirbýr sig fyrir Evrópumeistaramótið þar sem Monk ætlaði honum stórt hlutverk í vetur hjá Leeds.