Wenger lofaði mér paradís

Svissneski landsliðsmaðurinn Granit Xhaka segir að fagurgalinn í Arsene Wenger, stjóra Arsenal, hafi sannfært hann um að koma til London.

Xhaka kom til félagsins frá Mönchengladbach á dögunum og skrifaði undir langan samning við Arsenal.

„Það var bilun að tala við Wenger. Hann er goðsögn og ég hef alltaf litið upp til hans,“ sagði Xhaka.

„Allt í einu er ég að tala við hann í símann og hann segist vilja semja við mig. Hann sagði mér að koma til Arsenal ef ég vildi njóta þess að spila fótbolta. Hann sagði að Arsenal væri eins og paradís.“

Leikmaðurinn var ánægður með að hafa gengið frá sínum málum fyrir EM svo hann gæti notið þess að spila á mótinu.

„Það var mjög mikilvægt fyrir mig að klára þessi mál. Ég vildi mæta í undirbúninginn með hausinn í lagi. Ég vildi ekki að neitt væri að trufla mig.“