Mourinho: Ég kem til baka í júlí

Jose Mourinho er viss um það að hann verði orðinn knattspyrnustjóri hjá félagi þegar júlímánuður rennur upp en Portúgalinn segist ekkert vita um Manchester United starfið.

Mourinho hitti blaðamenn í tengslum við góðgerðaleik á Azteca-leikvanginum í Mexíkóborg þar sem hann var að stýra liði með goðsögnum eins og Ronaldinho og Fabio Cannavaro.

Hinn 53 ára gamli Jose Mourinho hefur verið atvinnulaus síðan að hann var rekinn frá Chelsea um miðjan desember síðastliðinn. Síðan þá hefur hann verið stanslaust orðaður við stjórastarfið hjá Manchester United.

„Auðvitað sakna ég þess að stýra fótboltaliði. Ég kem til baka í júlí. Við erum í maí það er ekkert að bíða frá maí til júlí. Ég held bara áfram að njóta lífsins og eyða tíma með fjölskyldunni en í júlí kem ég aftur," sagði Jose Mourinho við AP.

Jose Mourinho segist ekki þurfa að ganga frá þessum nýja samningi fyrr en 30. júní og það lítur því út fyrir það að það sé einhver tími í það að heimurinn fái að vita hvar Mourinho verði næsta vetur.

Jose Mourinho er kokhraustur og óhræddur með að lýsa því yfir að hann fái lið eftir tvo mánuði. Það þreytast aftur á móti enginn á því að orða hann við starfið hans Louis van Gaal.

Louis van Gaal getur enn gert Manchester United að enskum bikarmeisturum en það eru hinsvegar ekki miklar líkur á því að hann skilið United-liðinu í Meistaradeildina.