EM í hættu hjá Welbeck

Óvíst er hvort Danny Welbeck, framherji Arsenal, verði með á EM í Frakklandi í sumar vegna hnémeiðsla.

Welbeck fór meiddur af velli í 2-2 jafntefli Arsenal og Manchester City í ensku úrvalsdeildinni í gær og eftir leikinn sagði Arsene Wenger, knattspyrnustjóri Arsenal, stöðuna á framherjanum óljósa.

„Hann er svekktur og hann er ekki leikmaður sem fer svo glatt af velli. Ég hef smá áhyggjur en vil ekkert segja um EM,“ sagði Wenger.

Welbeck sneri aftur í lið Arsenal í febrúar eftir að hafa verið frá í 10 mánuði vegna hnémeiðsla. Hann hefur skorað fjögur mörk í 11 deildarleikjum fyrir Arsenal á tímabilinu.

Í síðustu viku kom í ljós að annar Arsenal-maður, Alex Oxlade-Chamberlain, missir af EM vegna hnémeiðsla. Roy Hodgson, landsliðsþjálfari Englands, tilkynnir lokahóp sinn fyrir mótið á fimmtudaginn.