Enginn Íslendingur í sigurliði

Ekkert Íslendingarlið náði í sigur í ensku B og C-deildinni í fótbolta í dag, en fjórir Íslendingar voru í eldlínunni með sínum liðum í dag.

Jóhann Berg Guðmundsson spilaði allan leikinn fyrir Charlton sem er í 23. sæti af 24 liðum eftir 3-0 tap fyrir Sheffield Wednesday á útivelli. Þeir eru sex stigum frá öruggu sæti.

Aron Einar Gunnarsson spilaði síðustu 25 mínúturnar fyrir Cardiff sem gerði 1-1 jafntefli við Reading á útivelli, en Cardiff er í sjöunda sætinu - þremur stigum frá umspilssæti.

Björn Bergmann Sigurðarson kom inná sem varamaður á 72. mínútu þegar Wolves gerði 1-1 jafntefli við Burnley. Wolves í tólfta sætinu með 48 stig.

Eggert Gunnþór Jónsson var tekinn af velli á 70. mínútu í 2-0 tapi Fleetwood Town gegn Barnsley í ensku C-deildinni. Fleetwood er í nítjánda sætinu, þremur stigum frá fallsæti.