Swansea verður að losa sig við Bradley

Það verður seint sagt að það sé rífandi hamingja með störf Bandaríkjamannsins Bob Bradley sem er stjóri Swansea City.

Bradley tók við liði Swansea í október en það hefur hvorki gengið né rekið undir hans stjórn. Stuðningsmenn hafa tapað þolinmæðinni og fóru fram á að hann yrði rekinn í gær er liðið tapaði gegn West Ham.

Swansea hefur tapað sjö af ellefu leikjum sínum undir stjórn Bradley og situr í fallsæti.

Ian Walsh, fyrrum framherji Swansea, segir að félagið geti ekki annað en rekið stjórann.

„Það er eins og hann ráði einfaldlega ekki við starfið. Hann virðist engan veginn átta sig á því sem þarf að gera. Auðvitað þurfa leikmenn líka að axla ábyrgð en þetta endar alltaf hjá stjóranum. Honum hefur mistekist,“ sagði Walsh.

„Ef ekki verður gripið í taumana blasir ekkert við nema fall. Bandarísku eigendurnir gáfu landa sínum tækifæri en þessi tilraun gekk ekki upp. Þeir verða að sætta sig við það.“