Klopp: Man ekki eftir mörgum færum hjá Chelsea

Jürgen Klopp var að vonum kátur með sigur Liverpool á Chelsea í 5. umferð ensku úrvalsdeildarinnar í kvöld.

Liverpool var 0-2 yfir í hálfleik og þrátt fyrir að Diego Costa minnkaði muninn eftir klukkutíma héldu gestirnir úr og fögnuðu stigunum þremur.

„Þetta var að sjálfsögðu ánægjulegur sigur. Frá upphafsflautinu var gríðarlega góð hreyfing á liðinu, við vorum fljótir að hugsa og spiluðum mjög vel. Við áttum skilið að vera yfir í hálfleik,“ sagði Klopp.

„Við verðum að læra að fylgja leikskipulaginu. Chelsea hefur oft skorað mörk á lokasekúndunum eftir beinskeyttar sóknir á þessu tímabili. En ég man ekki eftir mörgum færum hjá þeim í leiknum. Við duttum stundum niður sem er eðlilegt gegn góðu liði.“

Þjóðverjinn var að mestu sáttur með spilamennsku sinna manna í leiknum í kvöld.

„Það var gaman að horfa á þetta. Í seinni hálfleik var þetta aðeins erfiðara en eftir að þeir skoruðu gerðum við vel,“ sagði Klopp sem hefur unnið sigur í báðum heimsóknum sínum með Liverpool á Stamford Bridge.