Markvörður West Ham úr leik

Spænski markvörðurinn Adrián spilar ekki meira með West Ham á þessu tímabili vegna meiðsla.

Adrián, sem er 29 ára, meiddist á kálfa í 3-0 sigri West Ham á West Brom um síðustu helgi og missir af þeim sökum af þremur síðustu leikjum Hamranna í ensku úrvalsdeildinni.

West Ham á enn möguleika á að komast í Meistaradeild Evrópu á næsta tímabili. Liðið er í 6. sæti úrvalsdeildarinnar með 59 stig, fimm stigum á eftir Manchester City sem er í 4. sætinu.

City á aðeins tvo leiki eftir en West Ham þrjá; gegn

Swansea City, Manchester United og Stoke City. Írinn Darren Randolph mun verja mark West Ham í þessum þremur leikjum.

Adrián lék 32 deildarleiki með West Ham í vetur og hélt hreinu í átta þeirra.