Það verður gaman að spila við Gylfa í fyrsta leik

„Ég hef oft sagt að draumurinn sé að spila í ensku úrvalsdeildinni og nú er ég kominn þangað þannig að það er auðvitað hægt að segja að draumurinn sé að rætast,“ sagði landsliðsmaðurinn Jóhann Berg Guðmundsson í samtali við Fréttablaðið í gær, skömmu eftir að fréttir bárust af því að hann væri búinn að semja við Burnley. Jóhann Berg segir að félagið og áhuginn sem það sýndi á að fá hann hafi heillað.

„Þetta var alltaf fyrsti kostur. Ég ákvað að stökkva á tækifærið og líst mjög vel á þetta. Þeir hafa verið að skoða mig frá því í desember. Eftir EM ákváðu þeir svo að keyra á þetta. Það verður gaman fyrir mig að spreyta mig í þessari deild,“ sagði Jóhann Berg sem vildi lítið tjá sig um áhuga annarra liða.

Jóhann Berg segist hlakka til að spila fyrir knattspyrnustjórann Sean Dyche sem þykir mjög fær í sínu starfi og hefur komið Burnley tvisvar upp í ensku úrvalsdeildina.

„Hann er skemmtilegur maður. Hann vill að sínir menn gefi 120% í allar æfingar og alla leiki. Mín fyrstu kynni af honum eru mjög jákvæð og ég er á því að hann geri mig að betri leikmanni,“ sagði Jóhann Berg sem mætir væntanlega samherja sínum úr íslenska landsliðinu, Gylfa Þór Sigurðssyni, þegar Burnley tekur á móti Swansea City í 1. umferð ensku úrvalsdeildarinnar laugardaginn 13.?ágúst næstkomandi.

„Það verður gaman að spila við hann í fyrsta leik. Þeir mæta á Turf Moor og það verður ekki auðvelt fyrir þá,“ sagði Jóhann Berg en Burnley tapaði aðeins tveimur deildarleikjum á heimavelli á síðasta tímabili. ingvithor@365.is