Wenger: Vangaveltur vanvirðing við Van Gaal

Arsene Wenger, stjóri Arsenal, er ekki hrifinn af fréttaflutningi um framtíð Louis van Gaal hjá Manchester United.

Van Gaal er sagður valtur í sessi eftir slæmt gengi United að undanförnu og Jose Mourinho, sem var rekinn frá Chelsea í síðustu viku, er sterklega orðaður við starfið. Umboðsmaður hans hefur þó sagt að engar viðræður hafa átt sér stað á milli aðila um starfið.

Sjá einnig: Ekkert tilboð komið frá United

„Ég vil ekki stíga inn í heim sögusagna,“ sagði Wenger á blaðamannafundi sínum í dag. „Ég ber persónulega gríðarlega virðingu fyrir Louis van Gaal og mér finnst að það sem er nú í gangi sé vanvirðing gagnvart honum.“

„Þessi maður á 30 ár að baki í knattspyrnunni og hefur náð ótrúlegum árangri. Auðvitað á hann skilið að fá meiri tíma.“

Pep Guardiola, stjóri Bayern, tilkynnti á dögunum að hann myndi hætta hjá Bayern München í sumar en Wenger telur ótímabært að tilkynna brotthvarf sitt með svo skömmum fyrirvara.

Sjá einnig: Guardiola mun hætta með Bayern eftir tímabilið

„Ég er sjálfur ekki hrifinn af því. Það er ekki endilega gott fyrir liðið þeirra og aðra stjóra sem eiga erfitt uppdráttar,“ sagði Wenger en Guardiola hefur lengi verið orðaður við lið á Englandi, allra helst bæði Manchester-liðin og Chelsea.