Ekkert tilboð komið frá United

Þrátt fyrir fullyrðingar enskra fjölmiðla um hið gagnstæða hafa engar viðræður átt sér stað á milli Manchester United og Jose Mourinho síðan að sá síðarnefndi var rekinn frá Chelsea í síðustu viku.

Louis van Gaal, stjóri United, er sagður afar valtur í sessi eftir þrjá tapleiki í röð en Jorge Mendes, umboðsmaður Mourinho, segir að það sé ekkert tilboð sem liggi á borðinu fyrir hans mann.

„Við vitum ekki hvað gerist íframtíðinni en það er ekkert samkomulag. Það er ekkert tilboð heldur, það er ekki satt,“ sagði Mendes við fjölmiðla ytra.

Sjá einnig: Times: United ræddi við Mourinho í síðustu viku

Van Gaal og Mourinho eru miklir mátar eftir að þeir störfuðu saman hjá Barcelona á sínum tíma. Mourinho er því ekki sagður vilja fara í samningaviðræður við United á meðan að Van Gaal er enn starfandi hjá félaginu.

Enska blaðið The Guardian heldur því hins vegar fram að stjórn United hafi fengið þau skilaboð að Mourinho hafi áhuga á starfinu en að skiptar skoðanir séu innan hennar um hvort að halda eigi tryggð við Van Gaal eða leita til Portúgalans.

Stjórnarmenn United voru heldur ekki á einu máli um eftirmann Alex Ferguson á sínum tíma en völdu á endanum að semja fremur við David Moyes en að fara í samningaviðræður við Jose Mourinho.