Hefur látið tugi fanga lausa

Stjórnvöld á Kúbu hafa látið 53 pólitíska fanga lausa samkvæmt samningi, sem gerður var við Bandaríkin í síðasta mánuði.

Lausn fanganna er eitt þeirra skilyrða, sem Bandaríkin settu fyrir bættum samskiptum ríkjanna eftir hálfrar aldar gagnkvæman fjandskap.

Bæði Bandaríkin og Kúba hafa verið treg til að birta nöfn þeirra fanga sem látnir hafa verið lausir. Bandaríkjastjórn staðfesti hins vegar í gær að þeir hefðu verið látnir lausir.

Óljóst er þó hvort þeir hafi allir setið í fangelsi. Sumir gætu þegar hafa verið látnir lausir, en búið við ferðahömlur og aðrar takmarkanir sem nú hefur verið aflétt.

Allir eru þeir þó sagðir hafa hlotið dóm fyrir að krefjast pólitískra réttinda eða umbóta.