Innlent

Sex barnshafandi konur eru í óvissu

Kristjana Guðbrandsdóttir skrifar
Viðræður þokuðust hægt fram á við í gær í karphúsinu. Sigurveig eygði möguleika á að deiluaðilar næðu saman. Á meðan bíða veikir og þeirra á meðal sex barnshafandi konur.
Viðræður þokuðust hægt fram á við í gær í karphúsinu. Sigurveig eygði möguleika á að deiluaðilar næðu saman. Á meðan bíða veikir og þeirra á meðal sex barnshafandi konur. Vísir/Ernir
Fresta hefur þurft ríflega 700 skurðaðgerðum, um 100 hjartaþræðingum, 800 myndgreiningarannsóknum og 3.000 dag- og göngudeildarkomum vegna verkfallsaðgerða lækna.

Sex konur bíða þess að fara í keisaraskurð í valkvæðar aðgerðir. Mögulega eiga þær ekki kost á að fara í þær á þeim tíma sem ákveðið var. Þetta eru þær tölur sem Landspítalinn getur birt um áhrif verkfallsins en á slíkri stofnun eru áhrifin mun víðtækari og hefur ómæld áhrif á líðan veikra í landinu enda hefur meðferð inniliggjandi sjúklinga frestast og hægt hefur verulega á útskriftum.

Þær barnshafandi konur sem um ræðir eru samkvæmt heimildum Fréttablaðsins mjög uggandi. Ein þeirra er sett í lok vikunnar en telur líkur á að aðgerðinni verði frestað fram yfir helgi.

Ólafur Baldursson, framkvæmdastjóri lækninga, segir stöðuna mjög alvarlega og konurnar sex sem bíða eftir keisaraskurði segir hann undir sérstöku eftirliti. „Það verður fylgst sérstaklega með þeim. Vissulega getur farið svo að tímasetningar hjá þeim truflist eitthvað og það verður passað að vera í nánu sambandi við þær.“

Engin fordæmi eru fyrir verkfallsaðgerðum eins og hafa staðið yfir og Ólafur segir lán að engin dauðsföll eða alvarleg atvik hafi orðið. „Þetta hefur aldrei verið gert áður. Viðkvæm starfsemi eins og okkar má ekki við neinu af þessu tagi.“

Krísuástand Ólafur Baldursson framkvæmdastjóri lækninga.
Hann segir mikið verkefni fram undan. Vandi þeirra veiku sem bíða nauðsynlegrar þjónustu vindi upp á sig. „Líðan fólks á biðlistunum breytist og það gerir okkur erfitt fyrir að tryggja öryggi þeirra.“

Hann segir framkvæmdastjórnina funda daglega og taka púlsinn á stöðunni. Það sé ljóst að það muni verða bæði kostnaðarsamt og tímafrekt að vinda ofan af ástandinu.

„Þetta er krísuástand og við eigum engar töfralausnir til að bregðast við því ástandi sem nú ríkir. Það er barist frá degi til dags. Það á eftir að taka langan tíma að vinna þessa biðlista upp og það á eftir að kosta viðbótarfjármuni, sú vinna verður líklega að fara fram á kvöldin og um helgar. Það er flókið og það er kostnaðarsamt.“

Ekki náðust samningar á fundi samningarnefndar lækna og ríkis sem hófst klukkan tvö í gær og stóð fram á nótt. Aðilar munu setjast að samningarborðinu að nýju klukkan tvö í dag. Sigurveig Pétursdóttir, formaður samninganefndar Læknafélags Íslands, sagði í gærkvöldi viðræður þokast áfram og eygði möguleika á því að að deiluaðilar næðu saman. Það gekk hins vegar ekki eftir.

Verkfall lækna sem starfa á aðgerðasviði og flæðasviði er boðað til fjögurra daga. Þá hefur verkfall skurðlækna verið boðað frá 12. janúar næstkomandi náist ekki að semja. Fundur í deilu þeirra hefur ekki verið boðaður.


Tengdar fréttir




Fleiri fréttir

Sjá meira


×