Einungis konur í fyrirhugaðri tunglferð Rússa

Hópur sex rússneskra kvenna mun eyða næstu átta sólarhringum í tilraunageimfari en þær undirbúa sig nú af kappi fyrir fyrirhugaða geimferð Rússa til tunglsins árið 2029.

Standist konurnar þrekraunina verða þær skrefinu nær því að manna fyrstu tunglferðina í sögunni sem einungis hefur verið skipuð konum. Að sögn þeirra sem standa að verkefninu er ætlunin að kanna „andlega og líkamlega getu kvenlíkamans“ til að takast á við þá krafta sem verka á skrokkinn í geimnum.

Konunum verður hleypt út úr tilraunafarinu fimmtudaginn 5. nóvember en haft er eftir Sergei Ponomarev, stjórnanda verkefnisins, á vef the Guardian að honum muni þykja áhugavert að sjá hvernig konunum mun koma saman – „og hvernig þeim mun takast að leysa verkefnin um borð. Við höfum trú á því að konur séu ekki einungis jafnokar karla í geimnum heldur jafnvel betri,“ sagði Ponomarev í dag.

Rússar brautryðjendur í geimnum

Sovétríkin sendu fyrstu konuna í geiminn, Valentinu Tereshkvou, en hún eyddi þremur dögum á sporbaug um jörðina árið 1963. Tveimur árum áður hafði annar Sovétríkjamaður, Yuri Gagarin, rutt geimferðabrautina. Þá er ótalin sovéska tíkin Laika sem varð fyrsta dýrið til að fara á sporbraut um Tellus árið 1957.

Fyrr í vikunni tilkynnti Geimferðastofnun Rússlands, Roscosmos, að fyrirhugað væri að senda mannað far til tungslins árið 2029. Smíði er hafin á geimfarinu sem mun ferja hópinn en búist er við því að það fari í jómfrúarferðina sína árið 2021. Tveimur árum síðar mun geimfarið tengjast Alþjóðageimstöðinni (ISS) og árið 2025 mun það halda í ómannaða för til móts við tunglið.

Rússar og evrópska geimferðastofnunin fyrirhuga sameiginlega, ómannaða för til tungslins árið 2020 með það fyrir augum að kanna hversu fýsilegt stirnið er sem áningarstaður fyrir mennina.

Konurnar sex sem taka þátt í fyrrnefndu verkefni voru valdar úr hópi tíu umsækjenda sem allir höfðu staðist ítarlegar prófanir síðustu vikna. Konurnar eru allar menntaðar á sviði læknis- eða líftæknivísindanna og mega þær búast við því að þurfa að þreyta um 30 próf meðan á einangrunni stendur.