Naismith á leið til Norwich

Steven Naismith er á leið frá Everton á nýju ári en félagið hefur samþykkt að selja hann til Norwich fyrir átta milljónir punda eða um einn og hálfan milljarð króna.

Norwich reyndi fyrst að kaupa Naismith í sumar en það gekk ekki eftir. En þrátt fyrir að tilboð félagsins hafi verið samþykkt nú er ekki víst að það dugi til þar sem að fjöldi annarra félaga í ensku úrvalsdeildinni mun hafa áhuga á kappanum.

Sjá einnig: Varamaðurinn Naismith sá um Chelsea | Sjáðu mörkin

Naismith skoraði þrennu fyrir Everton gegn Chelsea eftir að hafa komið inn á sem varamaður en þrátt fyrir það hefur hann lítið fengið að spila og aðeins verið í byrjunarliði Everton í fjórum deildarleikjum þetta tímabilið.

Roberto Martinez, stjóri Everton, mun hafa verið tregur til að selja hann í sumar en afstaða hans er sögð vera önnur nú. Meðal þeirra félaga sem hafa áhuga á honum eru Sunderland, Swansea, Aston Villa og Newcastle en öll eru þau að berjast fyrir lífi sínu í ensku deildinni.