Klopp: Ég strái ekkert töfraryki yfir alla og þá geta þeir spilað fótbolta

Jürgen Klopp náði ekki í sigur í fyrsta leik sínum sem knattspyrnustjóri Liverpool. Liðið gerði markalaust jafntefli í fyrsta leik Þjóðverjans á White Hart Lane á laugardaginn.

Sá þýski var svona mátulega sáttur við frammistöðu sinna manna sem spiluðu mikla pressu eins og einkennir lið hans. Hann veit þó að sínir menn geta gert mun betur.

„Við stráum ekki bara töfraryki yfir alla og segjum: „Nú getið þið spilað fótbolta.“ Þeir vita hvernig þeir eiga að spila. Auðvitað er pressa á okkur en þetta er ekki mesta pressan,“ sagði Klopp eftir leikinn.

Hann tók nokkra leikmenn fyrir sem hann sagði að gætu klárlega spilað betur og byrjaði á að tala um Adam Lallana.

„Ég veit ekki hversu oft þið hafið séð Lallana svona. Ég þekki hann frá því hann var í Southampton. Hann getur gert 20-30 prósent betur,“ sagði Klopp.

„Coutinho? Haldið þið að hann geti ekki spilað betur? Auðvitað getur hann það. Lucas? Haldið þið að hann geti ekki gefið boltann til hægri og vinstri. Hann getur það.“

„Og Can? Getur hann ekki lært þessi hlaup og gefið boltann? Hann getur lært það. Milner? Hann er hinn fullkomni atvinnumaður. Algjör vél. Hann hefur allt.“

„Við þurfum bara að hjálpa þessum strákum að sýna hvað þeir geta. Þetta eru ekki stærstu vandamálin í lífinu,“ sagði Jürgen Klopp.