Lucas: Klopp er mjög ástríðufullur maður

Þjóðverjinn Jürgen Klopp er búinn að stýra sinni fyrstu æfingu hjá Liverpool og voru leikmenn ánægðir með hana.

Miðjumaðurinn Lucas Leiva segir að Klopp hafi lagt ákveðnar línur með hvað leikmenn þurfi að gera til að ná árangri og grimmd sé stór hluti af því.

Lucas er ánægður með hraðann og ákefðina sem Klopp vill hafa á æfingum.

„Þetta var mjög jákvætt. Hann virðist vera mjög ástríðufullur maður. Hann gefur mikið af sér og vill fá það sama frá leikmönnum," sagði Lucas.

„Verið ákafir og grimmir við sjálfa ykkur er það sem hann predikar. Alltaf að gera betur. Fara tíu metrum lengra en venjulega því það sé lykillinn að árangri. Hann virðist líka vera mjög opinn og viljugur til að tengjast leikmönnum. Líka heiðarlegur og opinskár."

Fyrsti leikur Liverpool undir stjórn Klopp er á laugardag er liðið spilar gegn Tottenham á White Hart Lane.