Mignolet og Lovren klárir í slaginn

Simon Mignolet og Dejan Lovren, leikmenn Liverpool, eru klárir í slaginn á ný eftir meiðsli og verða að öllum líkindum í leikmannahópi liðsins gegn Leicester City á öðrum degi jóla.

Sjá einnig: Níu tíma jólafótboltaveisla í ár

Mignolet tekur væntanlega stöðu Adams Bogdan í markinu en sá síðarnefndi átti erfitt uppdráttar í 3-0 tapinu fyrir Watford á sunnudaginn.

Lovren er meira spurningarmerki en hann meiddist eftir ljóta tæklingu frá Craig Gardner, leikmanni West Brom, í leik liðanna á dögunum.

Liverpool er í vandræðum í miðri vörninni en Martin Skrtel fór meiddur af velli gegn Watford og verður frá keppni næstu sex vikurnar.

Þá er Mamadou Sakho nýkominn til baka eftir meiðsli en hann virkaði langt því frá tilbúinn gegn Watford.

Sjá einnig: Carragher ráðleggur Klopp að kaupa leikmenn í þessar stöður

Liverpool er í 9. sæti ensku úrvalsdeildarinnar með 24 stig en liðið hefur aðeins fengið eitt stig úr síðustu þremur leikjum sínum.