Cameron boðar til viðbragðsæfingar vegna hryðjuverkaárása í London

Öryggissveitir Bretlands munu á næstu tveimur dögum fara í viðbragðsæfingu við hryðjuverkaárásum í London. Þetta tilkynnti forsætisráðherra landsins David Cameron í dag á breska þinginu.

Cameron sagði í tilkynningunni að þessi þjálfun eða æfing myndi tryggja það að Bretland gæti tekist á við hryðjuverkaárás. Æfingin kemur í kjölfar árásar á strandhótel  í Túnis á föstudag en þar myrti íslamskur öfgamaður að minnsta kosti átján Breta. Forsætisráðherrann sagði þessa tölu eiga eftir að hækka þar sem enn á eftir að nafngreina nokkra sem létust vegna þess að fórnarlömbin voru í strandfötum og ekki með skilríki sín á sér. Alls 38 manns létust í árásinni. Viðbragðsæfingin hafði þó verið skipulögð fyrir nokkrum mánuðum eftir árásina á ritstjórn skopmyndatímaritsins Charlie Hebdo í París.

Æfingin á að athuga og endurbæta viðbragðsáætlun Bretlands ef kæmi til alvarlegrar hryðjuverkaárásar. Samkvæmt umræðum í þinginu verða borgarbúar varir við æfinguna en Cameron sagði þó að hún myndi ekki hafa áhrif á daglegt líf þeirra að nokkru leyti.

Sjaldan er þögn í breska þinginu en í dag þögðu þingmenn í mínútu til þess að minnast fórnarlamba árásarinnar.