Wenger: Wilshere er ekki til sölu

Arsene Wenger, knattspyrnustjóri Arsenal, ætlar ekki að selja enska landsliðsmanninn Jack Wilshere sem hefur verið orðaður við Manchester City undanfarna daga.

„Við erum ekki í þeirri stöðu lengur að við þurfum að selja okkar bestu menn,“ sagði Wenger.

Wilshere hefur verið í herbúðum Arsenal síðan hann var níu ára gamall en verið mikið frá vegna meiðsla undanfarin misseri.

„Við getum ekki rætt allar fyrirsagnir blaðanna sem ekki eru sannar á blaðamannafundum,“ sagði Frakkinn á fréttamannafundi í gær.

Wilshere, sem er enn og aftur að jafna sig af meiðslum, spilaði með U21 árs liði Arsenal í vikunni og gæti spilað sinn fyrsta leik síðan í nóvember um helgina.

„Það geta allir lagt sín lóð á vogarskálarnar fram undir enda tímabilsins,“ sagði Arsene Wenger.