Trúi varla að meirihlutinn sé í góðum málum í þessu ferli

Formaður Hjartans í Vatnsmýri segir borgarstjórnarmeirihlutann í Reykjavík kominn langt fram úr sjálfum sér með því að leyfa framkvæmdir við flugbrautarenda, meðan ákvörðun þar til bærs stjórnvalds um að loka brautinni liggi ekki fyrir.

Minnsta flugbrautin er orðin víglínan í hatrömmum deilum ríkis og borgar um framtíð Reykjavíkurflugvallar. Valsmenn fengu leyfi borgar til að hefja framkvæmdir við nýja íbúðabyggð en fengu svo synjun í síðustu viku frá ríkisvaldinu um að byggingarkranar fengju að rísa.

Njáll Trausti Friðbertsson, annar formanna Hjartans í Vatnsmýri, segir í viðtali við Svein Arnarsson fréttamann á Akureyri, að það ætti ekki að koma neinum á óvart að ekkert megi fara inn í hindrunarflöt flugvallar, hvorki krani né byggingar.

Vafi virðist leika á hvaða samninga borgin hafi í höndunum til að knýja á um lokun brautarinnar. Bréf sem innanríkisráðuneytið ritaði fyrir hönd Hönnu Birnu Kristjánsdóttur, þáverandi innanríkisráðherra, til Isavia þann 30. desember 2013, gæti reynst lykilgagn, komi til málaferla, en þar var Isavia falið að hefja undirbúning að lokun brautarinnar. Jafnframt mælti ráðherra fyrir um formlega öryggisúttekt, en sagði svo:

„Rétt er að ítreka að flugbrautinni skal þó ekki lokað eða aðrar ákvarðanir teknar sem leiða til þess að flugbraut 06/24 verði tekin úr notkun á meðan verkefnastjórn, sem nú starfar undir forystu Rögnu Árnadóttur skv. samkomulagi ríkisins, Reykjavíkurborgar og Icelandair Group, er enn að störfum og ákvörðun á grundvelli tillagna hennar liggur ekki fyrir,“ sagði ráðuneytið.

Ákvörðun um lokun brautarinnar var þarna skilyrt; hún skyldi tekin á grundvelli tillagna Rögnunefndar og er í höndum núverandi innanríkisráðherra, Ólafar Nordal.

„Það hefur ekkert íslenskt stjórnvald tekið um það ákvörðun, sem er þess bært að taka þá ákvörðun, sem þarf að taka ef það á að loka flugbrautinni,“ segir Njáll Trausti. Hann segir þetta mjög skýrt og undrast hvert stjórnsýsla Reykjavíkurborgar sé komin að leyfa framkvæmdir.

„Þannig að ég held að menn séu bara komnir svolítið langt fram úr sjálfum sér og eru að lenda í gríðarlega erfiðum málum. Ég held að þetta hljóti að minnsta kosti að vera mikið umhugsunarefni fyrir meirihlutann í Reykjavík, sem er að stýra öllu þessu ferli, - þessir fjórir flokkar, - hvert menn eru komnir í öllu þessu máli, - um skaðabætur og annað. Ég ætla ekki að vera dómstóll þess máls en ég trúi varla að menn séu í góðum málum í þessu ferli,“ segir Njáll Trausti Friðbertsson.