Times: United ræddi við Mourinho í síðustu viku

Framtíð Louis van Gaal hjá Manchester United er enn til mikillar umfjöllunar í enskum fjölmiðlum en undir hans stjórn hefur liðið tapað síðustu tveimur leikjum sínum og ekki unnið síðustu fjóra í ensku úrvalsdeildinni.

Van Gaal er sagður afar valtur í sessi og eftir að Jose Mourinho var rekinn frá Chelsea í síðustu viku hefur hann verið ítrekaður orðaður við stjórastöðuna hjá United.

The Times slær því upp í dag að fulltrúar United hafi rætt við Mourinho og hans menn í síðustu viku en þá var innan við sólarhringur liðinn frá brotthvarfi hans frá Chelsea.

Sjá einnig: Mourinho rekinn frá Chelsea

Í umfjöllun blaðsins segir að ekkert samkomulag sé í höfn á milli Mourinho og Manchester United og að Portúgalinn vilji sýna Van Gaal þá virðingu að fara ekki í formlegar viðræður við forráðamenn United á meðan að Hollendingurinn er enn í starfi hjá félaginu.

„En það eru meira en helmingslíkur á því að United muni snúa sér að Mourinho ef Van Gaal tekst ekki að snúa gengi United við,“ segir enn fremur í grein Times.

Van Gaal: Ekki mitt að ákveða hvort ég haldi áfram með liðið

Jamie Carragher, einn sérfræðinga Sky Sports, er hins vegar ekki viss um að Mourinho henti fyrir Manchester United. „Hjá United gengur allt út á að vinna titla og Jose getur sannarlega unnið titla,“ sagði Carragher í gær.

Hann sagði þó enn fremur að það sé einnig hefð hjá United að nýta unga leikmenn úr akademíu félagsins og að það vilji að liðið sitt spili leiftrandi og skemmtilega knattspyrnu, helst í hverjum leik. „Hvorugt hefur verið einkenni Jose Mourinho,“ sagði Carragher.