Tottenham í þriðja sætið | Úrslit dagsins

Fimm leikjum er nú nýlokið í ensku úrvalsdeildinni en stærstu tíðindin úr þeim er að Tottenham skellti sér upp í þriðja sæti deildarinnar með 2-1 sigri á Watford.

Crystal Palace og Swansea gerðu markalaust jafntefli þar sem Gylfi Þór Sigurðsson átti eitt besta færi leiksins en hann kom inn á sem varamaður í leiknum. Það má lesa nánar um þann leik hér.

Stoke vann magnaðan 4-3 sigur á Everton í ensku úrvalsdeildinni í dag en leikurinn var fjörlegur eins og úrslitin bera með sér.

Austurríkismaðurinn Marko Arnautovic skoraði sigurmark leiksins úr vítaspyrnu í uppbótartíma, eftir að John Stones hafði brotið á Arnautovic sjálfum.

Xherdan Shaqiri kom Stoke tvívegis yfir í leiknum en Romelu Lukaku jafnaði í bæði skiptin fyrir Everton. Gerard Deulofeu kom svo Everton yfir á 71. mínútu áður en Mato Sanmartin jafnaði metin á 80. mínútu.

Mörk Shaqiri, sérstaklega það síðara, voru stórglæsileg eins og sjá má hér fyrir ofan og í þessari frétt.

Liðin voru jöfn að stigum fyrir leikinn með 26 stig en sigurinn fleytti Everton upp í áttunda sætið en Everton situr eftir í því tíunda.



Dramatískt hjá Tottenham

Tottenham vann annan dramatískan sigur á Watford á útivelli, 2-1. Erik Lamela kom gestunum yfir á sautjándu mínútu en Odion Ighalo jafnaði metin fyrir Watford.

Nathan Ake var svo rekinn af velli snemma í síðari hálfleik fyrir að fara með takkana á undan sér í Lamela en lengi vel leit út fyrir að Watford myndi hanga á stiginu til loka.

Son Heung-min skoraði sigurmarkið af stuttu færi eftir að Heurelho Gomes, fyrrum markvörður Tottenham, missti boltann klaufalega framhjá sér.

Tottenham komst upp í þriðja sæti deildarinnar en liðið er með 35 stig. Watford er í því sjöunda með 29 stig.

Aston Villa í miklum vanda

Botnliðin Newcastle og Aston Villa töpuðu enn og aftur sínum leikjum í dag. Newcastle tapaði fyrir West Brom, 1-0, þökk sé marki Darren Fletcher á 78. mínútu en þetta var fyrsti sigur West Brom í síðustu sex leikjum.

Newcastle er í átjánda sæti með sautján stig en grannliðið Sunderland kemur næst með tólf.

Aston Villa er svo langneðst með átta stig en liðið tapaði fyrir Norwich, 2-0. Jonny Howson og Dieumerci Mbokani skoruðu mörk Norwich sem, rétt eins og West Brom, komu sér frá fallsvæðinu með sigrinum í dag.