Tottenham nú bara einu stigi á eftir Manchester United

Tottenham komst upp í fimmta sæti ensku úrvalsdeildarinnar eftir 3-1 heimasigur á Aston Villa í kvöld í lokaleik 11. umferðar deildarinnar.

Tottenham komst í 2-0 en leikmenn Villa minnkuðu muninn ellefu mínútum fyrir leikslok áður en Harry Kane innsiglaði sigurinn í uppbótartíma.

Sigurinn var sanngjarn því Tottenham var betra liðið og stjórnaði leiknum stærsta hluta hans.

Mörk Tottenham í fyrri hálfleik komu líka á besta tíma, Moussa Dembélé skoraði það fyrra strax á 3. mínútu og Dele Alli það síðara í uppbótartíma fyrri hálfleiksins.

Jordan Ayew kom inná sem varamaður í fyrri hálfleiknum og hann minnkaði muninn í 2-1 á 79. mínútu leiksins.

Harry Kane tryggði Tottenham hinsvegar sigurinn á þriðju mínútu í uppbótartíma og er því búinn að skora fjögur mörk í síðustu tveimur deildarleikjum eftir að hafa skorað bara eitt deildarmark fram að því.

Tottenham komst upp fyrir West Ham með þessum sigri og er nú einu stigi á eftir Manchester United sem er í fjórða og síðasta sætinu sem gefur sæti í Meistaradeildinni á næstu leiktíð.

Tottenham 1-0 Aston Villa Tottenham 2-0 Aston Villa