Klopp: Liverpool-fjölskyldan þarf að róa sig aðeins

Jürgen Klopp, knattspyrnustjóri Liverpool, segir að allir sem einn í liðinu verða hrista úr sér hræðsluna sem tekur sig upp þegar hlutirnir ganga ekki alveg upp inn á fótboltavellinum.

Liverpool gerði 1-1 jafntefli við Southampton eftir að Christian Benteke hafði komið liðinu í 1-0 á 77. mínútu. Saido Mane jafnaði metin níu mínútum síðar og tryggði gestunum jafntefli.

„Þetta var bara eitt mark og bara fótboltaleikur. Það leit út fyrir að þetta væri það síðasta í lífinu. Við þurfum að róa okkur aðeins," sagði Jürgen Klopp við BBC eftir leikinn en Liverpool hefur gert jafntefli í fyrstu þremur leikjum sínum undir hans stjórn.

„Ég átta mig ekki alveg á þessari pressu en strákarnir finna greinilega fyrir henni. Ég vona að ég hafi ekki verið sá eini í leikvanginum í kvöld sem hugsaði: "Þetta er enginn heimsendir". Við getum unnið í þessu," sagði Klopp.

„Ég sá þroskamerki og ég sá liðið taka næsta skref. Við erum samt allir vonsviknir með úrslitin," sagði Klopp sem hefur hvorki unnið né tapað sem knattspyrnustjóri Liverpool.

„Vandamálið er að hin liðin eru ekkert að bíða eftir okkur. Þau vilja vinna, þau vilja vinna okkur," sagði Klopp en næst á dagskrá er deildabikarleikur á móti Bournemouth.

Bournemouth-leikurinn verður þriðji heimaleikur Klopp á innan við viku en Liverpool gerði 1-1 jafntefli við Rubin Kazan í Evrópudeildinni á fimmtudaginn var.

„Ævintýrin gerast ekki inn á fótboltavellinum. Stundum skrifum við slíkar sögur en það gerðist ekki í dag. Við getum lagað fullt af hlutum en það gengur ekki alltaf allt upp. Þó að þú vinnir í einhverju þá ertu aldrei hundrað prósent betri daginn eftir," sagði Klopp.

„Þetta er ekki spurning um hversu mikið þú getur breytt á stuttum tíma heldur hvað þú getur lagað og nýtt þér í næsta leik á eftir," sagði Klopp.