Segir það ekki hafa verið rétt að veita Obama friðarverðlaun Nóbels

Geir Lundestad, fyrrverandi forstöðumaður norsku Nóbelsstofnunarinnar, segir ekki hafa verið rétt að veita Barack Obama Bandaríkjaforseta friðarverðlaun Nóbels.

Þetta kemur fram í bók Lundestad, „Fredens sekretær - 25 år med Nobelprisen“ sem var gefin út í morgun.

Í frétt Verdens Gang kemur fram að Lundestad segi það jafnframt hafa verið mistök að skipa Thorbjørn Jagland sem formann norsku Nóbelsnefndarinnar. Hann segir þá Jagland hafa komið vel saman, en að ekki sé við hæfi að fyrrum forsætis- og utanríkisráðherra taki sæti í nefndinni. Jagland hafi einnig gegnt embætti forseta Evrópuráðsins og að stöðurnar færu illa saman.

Lundestad var forstöðumaður norsku Nóbelsstofnunarinnar í 25 ár, frá 1990 en hann lét af störfum fyrr á árinu. Í bókinni lýsir hann ýmsu því sem gerðist að tjaldabaki hjá Nóbelsnefndinni.

Vonlaust að standa undir væntingum

Nóbelsnefndin veitti Obama verðlaunin árið 2009 en Lundestad segist sjálfur hafa lýst yfir efasemdir við ákvörðunina. Vonlaust væri fyrir Obama að standa undir þeim væntingum sem gerðar voru til hans með því að afhenda honum verðlaunin, innan við ári eftir að hann tók við völdum. Lundestad segir jafnframt að skiptar skoðanir hafi verið meðal nefndarmanna en að lokum hafi þeir sameinast um Obama.

Lundestad greinir einnig frá því í bókinni að Jonas Gahr Støre, þáverandi utanríkisráðherra Noregs og núverandi formaður Verkamannaflokksins, hafi tvívegis varað Nóbelsnefndina við að veita kínverska baráttumanninum Liu Xiaobo verðlaunin, en afhendingin mætti mikilli andstöðu frá kínverskum stjórnvöldum.