Innlent

Ólöf Nordal vill afnema mannanafnalög

Kolbeinn Tumi Daðason skrifar
Ólöf Nordal hefur sterka skoðun á hlutverki mannanafnanefndar. Hún segir umræðuna oft á villigötum enda fari nefndin einfaldlega að lögum. Lögunum vill hún hins vegar breyta.
Ólöf Nordal hefur sterka skoðun á hlutverki mannanafnanefndar. Hún segir umræðuna oft á villigötum enda fari nefndin einfaldlega að lögum. Lögunum vill hún hins vegar breyta. Vísir/Valli

Ólöf Nordal innanríkisráðherra vill afnema mannanafnalög. Frumvarp er í smíðum í ráðuneytinu sem mun þó líklega ekki ganga svo langt. Ráðuneytið gerði könnun til að kanna viðhorf fólks til mannanafnanefndar og þeirra laga sem nefndin vinnur eftir. Vill meirihluti fólks rýmka reglurnar.

„Helst af öllu vil ég afnema mannanafnalög,“ segir Ólöf um þá vinnu sem verið hefur í gangi. Hún segist lengi hafa verið þeirrar skoðunar að endurskoða þurfi lögin.

„Ég held að það eigi að vera þannig að foreldrar eigi að ákveða sjálfir hvað börnin þeirra eigi að heita.“

Ólöf var í viðtali í Bítinu á Bylgjunni í morgun. Hlusta má á viðtalið í heild sinni í spilaranum hér að neðan.


Hvað ef foreldrar vilja skíra barnið Satan?

Það sem helst virðist standa í vegi fyrir því að fólk vilji ganga jafnlangt og Ólöf er varnaglinn að fólk geti ekki nefnt börn sín nöfnum sem geti komið þeim illa. Hvað ef foreldrar ákveða að skíra barn sitt Satan?

Ólöf spyr á móti hvort sömu foreldrum sé þá treystandi til að ala upp börnin sín. Eiga þau ekki alltaf að hafa hag barnanna að leiðarljósi? Önnur lög, svo sem barnalög, gætu komið til kastanna ef þannig mál kæmu upp.

Blær Bjarkadóttir og Björk Eiðsdóttir fóru alla leið fyrir dómstóla.

Ólöf nefnir til sögunnar fjölmörg mál sem vakið hafa athygli hennar og annarra hér á landi undanfarin misseri. Stúlkunafnið Blær fékkst loks samþykkt eftir að hafa farið alla leið fyrir héraðsdóm og svo er nærtækt dæmi hin unga Harriet sem fær ekki vegabréf hér á landi vegna nafns síns.

Þótt Ólöf vilji ekki ræða einstök dæmi finnist henni afar skrýtið að ekki megi skíra börn nafni úr menningarheimi foreldra. Íslendingum þætti væntanlega skrýtið ef þeir fengju ekki að skíra börnin í höfuðið á foreldrum sínum væru þau búsett erlendis.

Harriet og Duncan Cardew hafa heitið stúlka og drengur Cardew í Þjóðskrá frá fæðingu. vísir/daníel

Vernda íslenskuna
Aðspurð um samanburð við nágrannalöndin segir Ólöf það vera í skoðun. Hún telur lög sambærileg þeim sem mannanafnanefnd vinnur eftir ekki þar að finna.

„Rótin hjá okkur er að vernda íslenska tungu enda erum við svo lítið málssvæði. Mér finnst að við eigum að gera það. En mannanöfn eru kannski ekki lykilatriði.“

Ólöf ætlar að leggja fram frumvarp í haust og ítrekar sjálf að hún vilji helst afnema lögin. Hún er þó efins um að svo róttækt frumvarp næði í gegnum þingið.

Hún minnir á að Óttar Proppe, þingmaður Bjartrar framtíðar, hafi lagt fram frumvarp á síðasta þingi sem hafi ekki verið afgreitt. Um sé að ræða sameiginlegt áhugamál sem þau Óttar ræði oft.

„Í því frumvarpi var ekki skrefið gengið til fulls þótt veruleg rýmkun hafi verið á ferðinni.“


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.