Innanríkisráðuneytið hefur ekki afgreitt mál hinnar ellefu ára gömlu Harrietar Cardew ári eftir að kæran barst.

Foreldrar Harrietar kærðu þá úrskurð Þjóðskrár Íslands um að neita Harriet um vegabréf á grundvelli þess að nafn hennar væri ekki samþykkt af mannanafnanefnd.

„Mannanafnanefnd er eitt en það að hún fái ekki nein skilríki og vegabréf er svolítið alvarlegt,“ segir Kristín Cardew, móðir Harrietar.

Harriet og bróðir hennar, hinn þrettán ára gamli Duncan Cardew, hafa verið skráð sem stúlka og drengur Cardew í Þjóðskrá frá fæðingu. Því má áætla að Þjóðskrá muni einnig neita Duncan um vegabréf verði óskað eftir því. Kristín segir að börnin sín hafi í raun verið sett í farbann.

Innanríkisráðuneytið hefur tvívegis sent Ragnari Aðalsteinssyni, lögmanni fjölskyldunnar, bréf þar sem beðist er afsökunar á hve langan tíma afgreiðsla málsins hafi tekið. Fyrra bréfið barst í nóvember þar sem fram kom að niðurstöðu væri að vænta seint í janúar.

Í mars barst svo annað bréf þar sem fram kom að niðurstöðu væri að vænta í lok maí, fyrir einum mánuði.