Manchester United vill ólmt fá Schneiderlin

Svo virðist sem annað árið í röð sé Southampton að missa sína bestu leikmenn frá sér.

Dýrlingarnir þurftu að horfa á eftir Dejan Lovren, Rickie Lambert, Luke Shaw, Calum Chambers og Adam Lallana á síðustu leiktíð en stóðu sig engu að síður frábærlega og voru lengi í baráttunni um Meistaradeildarsæti.

Sky Sports greindi frá því í morgun að Liverpool færist nær því að ganga frá kaupum á hægri bakverðinum Nathaniel Clyne og þá er talið ansi líklegt að miðjumaðurinn Morgan Schneiderlin sé einnig á förum.

Samkvæmt heimildum Sky Sports vill Manchester United ólmt fá franska miðjumanninn í sínar raðir, en hann á í viðræðum við Dýrlingana þessa dagana þar sem hann biður þá um að sleppa sér lausum.

Southampton mun að öllum líkindum selja Frakkann í sumar eftir að halda honum nánast í hlekkjum í fyrra þegar hann vildi ólmur komast til stærra liðs eins og aðrir liðsfélagar hans.

Manchester United þarf að borga að minnsta kosti 25 milljónir punda fyrir Schneiderlin, að því fram kemur í frétt Sky Sports.

Frakkinn kom til Southampton frá Strasbourg 2008 og spilaði með Dýrlingunum í B og C-deildinni áður en liðið komst upp í efstu deild 2012.

Hann hefur verið einn af betri miðjumönnum deildarinnar undanfarin misseri og jafnan sá leikmaður sem kemst inn í flestar sendingar mótherjanna og þá vinnur hann mikið af tæklingum.

Manchester United fær samkeppni frá Arsenal í baráttunni um Frakkann, ef marka má fréttir enskra miðla undanfarna daga, en Tottenham er ekki lengur í baráttunni þar sem Schneiderlin mun aðeins yfirgefa Southampton fyrir lið sem er í Meistaradeildinni.