Hollande fundaði með Fídel Castro

Francois Hollande Frakklandsforseti og Fídel Castro, fyrrverandi Kúbuforseti, funduðu í gær á Kúbu en Hollande er nú í opinberri heimsókn á eyjunni.

Castro lét af forsetaembættinu árið 2008 og hefur ekki oft komið opinberlega fram síðan.

Hinn 88 ára Castro mætti Hollande í æfingajakka og sagðist enn „hafa mikið að segja“ þegar hann ræddi við fjölmiðla. Hollande lýsti Castro sem manni sem hafði ritað sig inn í söguna og hét því að gera allt sem í hans valdi stæði til að aflétta viðskiptabanninu á Kúbu.

Hollande er fyrsti leiðtogi Vesturlanda sem sækir Kúbu heim eftir að forsetar Kúbu og Bandaríkjanna tilkynntu í desember að unnið yrði að því að bæta samskipti ríkjanna.

Í tilefni af heimsókn Frakklandsforseta til Kúbu var skrifaður undir samningur milli franska olíurisans Total og kúbanska olíufyrirtækisins Cupet um olíuborun undan strönd Kúbu.