Sigríður er ekki hætt í pólitík og styður Árna Pál

Sigríður Ingibjörg Ingadóttir, þingmaður Samfylkingarinnar sem tapaði naumlega í formannskjöri flokksins á landsfundi flokksins um helgina, ætlar að halda áfram í pólitík. Í yfirlýsingu sem hún sendi frá sér í morgun lýsir hún yfir stuðningi við Árna Pál Árnason formann flokksins.

„Framboð mitt til formanns í Samfylkingunni á landsfundi nú um helgina var svar við kröfum fólks um breyttar og skýrari áherslur Samfylkingarinnar“, segir Sigríður meðal annars.

Hún segir að kosningabaráttan hafi verið „snörp“, en hún hefur verið gagnrýnd nokkuð harkalega af þungaviktarfólki innan Samfylkingarinnar fyrir að tilkynna svo seint um framboð sitt.

„Sitjandi formaður hafði betur og ég er sátt við þá niðurstöðu, styð Árna Pál og tel það styrkja flokkinn að undiralda fái að komast upp á yfirborðið og umbreytast í kraft til að skerpa áherslur jafnaðarstefnunnar og endurmeta stefnumál“, segir hún ennfremur.

Sigríður segir að öllum megi vera ljóst að áhrifa framboðsins gætti þegar daginn eftir, þegar nýtt fólk hafi verið valið til ábyrgðarstarfa innan flokksins, margt af því ungt hugsjónafólk með skýrar áherslur og með samþykktum landsfundar á róttækum ályktunum um lífskjör, umhverfisvernd, mannréttindi og frjálslyndi.

„Landsfundur Samfylkingarinnar varð allt í senn, snarpur, kröftugur og róttækur. Sú heift sem birst hefur vegna framboðs míns er í algjörri andstöðu við þann kraft sem kom fram á landsfundi. Ég kýs að túlka það sem svo að ásakanir áhrifafólks í Samfylkingunni vegna lýðræðislegs framboðs míns hafi verið settar fram í hita leiksins.“ Að lokum segir Sigríður að þau Árni Páll séu einhuga um að nýta kraftinn frá landsfundi til að herða sókn Samfylkingarinnar.

„Samfylkingin hefur á að skipa frábæru fólki á öllum aldri, af öllu landinu, sem ég hlakka til að starfa áfram með að réttlátara samfélagi. Við höfum verk að vinna."