Sú elsta heldur upp á 117 ára afmælið

Misao Okawa frá Japan, elsta manneskja í heimi, hélt upp á 117 ára afmæli sitt fyrr í dag.

Okawa er ein af fáum manneskjum sem fæddust á 19. öld og eru enn á lífi.

Framkvæmdastjóri hjúkrunarheimilis Okawa í borginni Osaka segir hana „í góðu formi“ en hún hélt upp á afmælið í faðmi fjölskyldu sinnar. Meðal gesta voru 92 ára sonur hennar og tveggja ára langömmubarn.

Afmælisbarnið tók við hamingjuóskum með jafnaðargeði, klædd bleikum kimono með kirsuberjablómamunstri. Aðspurð um leyndarmál langlífisins sagðist hún ekki hafa nokkra hugmynd um það.