Samið um frið í Suður-Súdan

Salva Kiir, forseti Suður-Súdan, og uppreisnarleiðtoginn Riek Machar hafa samið um frið eftir átök sem staðið hafa yfir í fimm mánuði.

Frá þessu greinir BBC. Samkomulagið kallar á að öll vopn verði lögð niður innan sólarhrings og tímabundinni ríkisstjórn verði komið á fót sem fyrst. Eftir það verður ný stjórnarskrá undirbúin og boðað til kosninga í þessu nýjasta landi heims.

Þúsundir hafa látið lífið í átökunum og rúmlega milljón manns þurft að yfirgefa heimili sín. Sameinuðu Þjóðirnar hafa ásakað báða aðila, stjórnvöld og uppreisnarmenn, um gróf mannréttindabrot. Samið var um vopnahlé í janúar síðastliðnum, en átök brutust út á ný skömmu síðar. 

Vonast er til að þetta samkomulag haldi lengur út en fulltrúi Afríkusambandsins, Smail Chergui, segir að það muni ekki reynast auðvelt að koma á varanlegum friði í Suður-Súdan eftir allt sem hefur á undan gengið.