Bardagar í kringum SOS barnaþorp í Suður-Súdan

Bardagi á milli stjórnarhers Suður-Súdans og uppreisnarmanna er nú ekki eingöngu í höfuðborginni, Juba, heldur einnig á öðrum svæðum.

Á jóladag hófst bardagi í Malakal þar sem eina SOS barnaþorp landsins er staðsett en 20 Íslendingar eru styrktarforeldrar barna í SOS barnaþorpinu í Malakal.

Bardaginn stóð í fjóra daga og á þeim tíma þurftu öll börn og starfsmenn SOS Barnaþorpsins að halda sig innan dyra. Þá settu starfsmenn þorpsins upp varnargarð til þess að þorpið væri sem öruggast.

Ekki þótti óhætt að flytja börn og SOS mæður þeirra á hættuminni stað, þar sem mikil hætta stafaði af því að vera utandyra á götum Malakal. Nokkrir uppreisnarmenn voru særðir þegar þeir reyndu að flýja í gegnum SOS svæðið en til allrar lukku særðist ekkert barnanna eða starfsfólk SOS.

Verslanir og bankar í Malakal hafa verið teknir yfir og því óttast starfsmenn SOS að skortur verði á mat og öðrum vörum. Einnig hræðast þeir að annar bardagi hefjist fljótlega.

Um eitt þúsund manns hafa látið lífið frá því að ófriðurinn hófst í Suður-Súdan í nýliðnum mánuði og 200.000 manns hafa flúið heimili sín.