Meistaradeildin nauðsynleg til að halda Suarez

Fyrir um ári síðan virtist Luis Suarez vera á förum frá Liverpool. Nú er hann hamingjusamur hjá félaginu sem er á leið í Meistaradeildina næsta vetur.

Suarez hefur farið á kostum í vetur og var á dögunum kosinn besti leikmaður ensku úrvalsdeildarinnar.

Stjórinn hans, Brendan Rodgers, viðurkennir að það hafi verið nauðsynlegt að komast í Meistaradeildina til þess að halda Suarez ánægðum.

"Það er lykillinn að því að halda honum ánægðum. Hann saknaði þess að fá ekki að keppa í deild þeirra bestu þar sem hann getur látið ljós sitt skína," sagði Rodgers.

"Hann sýndi mikla hollustu með því að vera áfram hérna og hjálpa okkur við að komast hingað. Vonandi uppsker hann vel í Meistaradeildinni næsta vetur."

Stjórinn segir að ást stuðningsmanna til leikmannsins hafi einnig átt þátt í því að hann ákvað að vera áfram.

"Hann myndi ekki njóta svona mikils skilnings og stuðnings alls staðar. Hann skilur það."